Alahady, 30 Martsa 2025
Sal 67. 1-5/ Hira 470: 1/ Mofonaina/Vavaka
Joela 2. 12-17
Fiantsoana ho amin’ny fibebahana
- Tsy amin’ny endrika ivelany
Izay fanao mahazatra teo amin’ny firenena Jiosy, ny fandrovitana fitafiana no matetika ho fanamarihana ny nenina. Tsy endrika ivelany toy izany anefa no tadiavin’ Andriamanitra momba ny fibebahana, ka nahatonga an’Andriamanitra niteny hoe: ny fonareo no triatriaro fa aza ny fitafianareo (2. 13a). tranga mety hiseho eo amin’ny mpanara-dia an’i Jesoa Kristy ny tranga toy izao. Ny ivelany no imasoan’ny olona ho fantatry ny manodidina fa mibebaka izy, fa ny ao anatiny dia mifanohitra amin’izany. Miantso antsika ny Tompo, aza atao amin’ny endrika ivelany fa aoka ao anatiny (fo) no triatriaro.
- Fa Andriamanitra dia mamindra fo sy mangora-po (2.13b)
Anisan’izay asongadin’ny Soratra Masina ao amin’ny Testamenta Taloha ny maha mpamindra fo sy mahari-po an’Andriamanitra (Eks 34. 6-7, Nom 14. 18) ho an’izay rehetra miverina ao Aminy amim-pahamarinana, ary afaka manafoana ireo loza efa nambarany Izy. Hiverina ho mahavokatra ny tany, ary azo atao ny manao fanatitra ho an’Andriamanitra sy hiravoravo, noho ny famindram-pony (2. 14). Izany no mampiavaka an’io Andriamanitra ivavahantsika io. Koa ho an’izay tena mibebaka marina tokoa dia hamindrany fo. Miantso antsika ny Tompo ankehitriny mba hibebaka, hivavaka sy hifady hanina, Izy anie hamindra fo aminao.
Fanontaniana:
Aminao, mba mahazo famindram-po avokoa ve ny olona rehetra?
Sampana Sekoly Alahady Foibe
