Alahady 16 Martsa 2025

2 Timoty 2. 19-21

Sal 100. 1-5/ Hira 171: 1/ Vavaka/ Hira 295:1

Miantso ho amin’ny fibebahana ny Tompo.

Manoloana irco fahavalo mandozan’ny Fiangonana, ka mahatonga ireo sasany mamadika ny finoana; eto amin’ity Perikopa ity ny Tompo dia miantso ho amin’ny fibebahana mba:

1. Hiorenana tsara

Mety hiala amin’ny fahamarinana ny mpino, noho ny fisian’ny mpaininany sandoka maro hitsangana ka hamitaka (Mat 24.11), fa ny fikasan’ Andriamanitra kosa dia ho amin’ireo izay efa mpanara-dia sy izay mifikitra Aminy. Ny tena Fiangonana marina tokoa dia tsy mety rava. Fantatr’Andriamanitra izay mahatoky sy miorina tsara amin’ny tenin’ny filazantsara dia Jesoa Kristy, Ilay vato fehizoron’ny finoana. Miantso ho amin’ny fibebahana ny Tompo, aoka isika hiorina tsara amin’izay efa nekena. Aza miova, mahareta, tazony hatramin’ny farany ny safidinao, aza mihemotra, fa tsy mba anisan’ny ankohonan Andriamanitra ny mpino tsy miorina tsara

2. Miala amin’ny faharatsiana sy ny fampianaran-diso

Izay efa tena an’Andriamanitra, ka nametraka ny fiainam-pinoany ao Aminy dia miala amin’ny faharatsiana sy ny fampianaran-diso. Ny fitondran-tena sy ny finiavana hanalavitra ny faharatsiana no iavahan’ny tena mpino marina. Ny Tompo mahalala ny Azy, aoka ny olona rehetra izay manonona ny anaran’ny Tompo hiala amin’ny ratsy (and.19). Fotoam-pibebahana izao ry havana; antomotra ny andro hiverenan’ny Tompo; miantso antsika rehetra hibebaka ny mpanoratra amin’ity perikopa ity. Herezo hatrany ary ry havako; ho anao izay efa miorina tsara; mitandrema; ialao ny faharatsiana sy ny fampianarana tsy araka ny Soratra Masina. Mibebaha fa antomotra ny andro

Fanontaniana:

Mibebaka? Ahoana ny fahazoan’ny olona izany?

Sampana Sekoly Alahady Foibe