Alakamisy, faha 10 Aprily 2025

(Sal 42.1-5 / Hira23.1,2 / Vavaka/ Mofonaina / Vavaka/Hira444.1,4)

Jaona 6. 47-58

Miresaka amin’ireto Jiosy manoloana Azy ireto momba ny « mofonaina » sy ny « mana » i Jesoa:

Ny « mana » teo amin’ny fiainan’ny olona

Nomen’Andriamanitra avy any an-danitra ny mana rehefa nangataka hanina ho azy ny olona (Eks 16. 15); ary tena zava-mahagaga tokoa izany satria toe-javatra niavaka sy nanehoan’ Andriamanitra ny maha Izy Azy tamin’ny olombelona. Fantatry ny olona tsara araka izany ny mana na dia tsy ireto taranaka ireto aza no nisitraka izany satria nampitaina tamin’ny taranaka mifandimby ny toe-javatra niainan’ny ray aman-dreny teo aloha. Izany hoe nino ny fisian’ny mana izy ireo na dia tsy hitany aza izany. Ny fotoana nisian’ny mana teo amin’ny tantaran’ny zanak’olombelona dia efa tamin’ny lasa, ary nomarihin’i Jesoa Kristy fa ireo taranaka nihinana izany mana izany dia efa maty avokoa. Araka izany dia tsy nahatazona ny ain’ireo olona nihinana azy akory ny mana nohaniny.

Ny « mofonaina » eo amin’ny fiainan’ny olona

Tahaka ny mana ihany dia nomen’Andriamanitra avy any an-danitra koa ny mofonaina. Ary miezaka mampahafantatra amin’ny taranaka miresaka Aminy eto i Jesoa fa tsara lavitra sy tena mahavoky mihoatra noho ny mana fantatr’ireto olona ireto ny mofonaina resahiny. Satria io mofonaina io no tena fihinana ary ao amin’io mofonaina io no misy ny tena fisotro izay manome fiainana mandrakizay. Manasa ireto olona miresaka aminy ireto i Jesoa mba hananan’izy ireo anjara amin’izany. saingy sarotra amin’ny olona izany. Nanafintohina azy ireo ny nilazan’i Jesoa hoe Izaho no mofo velona nidina avy tany an-danitra izay zaraina amin’ny olona.

Fanontaniana:

Inona no tian’i Jesoa hambara amin’ny hoe mofonaina?

Sampana Sekoly Alahady Foibe