Alatsinainy, 31 Martsa 2025

Sal 66. 1-5/Hira 24: 1/Vavaka/ Mofonaina / Vavaka

Jaona 12. 34-36

Miantso anao Jesoa

1. Mandehana raha mbola manana ny mazava

I Jesoa mihitsy eto no maniraka, ary ny tenany no notondroiny amin’io teny hoe mazava io. Mampirisika ny olona Izy mba handeha raha mbola manana ny mazava, sady hametraka ny fitokisany amin’ny mazava raha mbola manana izany ihany izy ireo.

2. Minoa ny mazava mba ho tonga zanaky ny mazava

Tsy hoe mahafantatra fotsiny, na hoe re laza any ho any fotsiny, fa asaina mino ny mazava ny mpianatra eto. Dia i Jesoa kristy. Indraindray tokoa, mahafantatra ny olona sasany fa tsy mino. Enga anie mba tsy tratran’izany fiheverana izany ianao. Raha toa ka nandeha tamin’ny fahazarana fotsiny ianao dia fotoam-pibebahana izao. Minoa ny mazava.

3. Mba tsy hahatratra anao ny maizina

Ny hoe « maizina » eto dia ambara mazava fa mifanohitra amin’ny mazava. Endrika tsy fahafantarana ny sitrapon’Andriamanitra, fa manaraka ny fanaon’izao tontolo izao. Fandavana ny tenin’i Jesoa. Tonga mantsy ny fotoana izay haneken’ny olona ny fampianaran’i Jesoa izay mitondra fahazavana ho an’ny fiainany. Ambaran’ny Soratra Masina fa izay mandeha amin’ny maizina dia tsy mahalala izay alehany. Mivonona ary mba tsy hahatratra anao ny aizina, raiso sy iaino ny fahazavana izay atolotra anao. Aza manaiky ho zanaky ny aizina, mizora amin’ny mazava fa ny maizina akory tsy haharesy ny mazava.

Fanontaniana:

Efa nandray ny fahazavana avy amin’ Andriamanitra ve ianao?

Sampana Sekoly Alahady Foibe