Alarobia 15 Janoary 2025

Sal 25.1-5 / Hira 549.1,2 / Vavaka / Mofonaina / Vavaka / Hira 549.5

2Tantara 20.5-9

Ahoana ny fomba hiatrehana zava-tsarotra?

Manoloana ny olana mbamin’ny ady sarotra sy manahirana toy izay nahazo an’i Josafata isika dia izao no atao:

1- Andriamanitra no tadiavo.

Tonga tao amin’ny faritra atsimon’ny Joda ny Moabita sy ny Amonita mba hiady aminy. Nisy tonga nanambara tamin’i Josafata fa olona marobe no tonga hanafika azy sy ny fanjakany (and.2). Natahotra mafy izy, saingy tsy nanaiky ho resy avy hatrany. Ny fitadiavana an’Andriamanitra no vahaolana hitany, ka dia navoriny ny vahoaka rehetra mba hiara-mivavaka sy hifady hanina; hitalaho famonjena avy amin’Andriamanitra. Izy mihitsy no nitarika ny vavaka tao an-tranon’i Jehovah teo anatrehan’ny vahoakan’ny Joda rehetra (and.5…). Toe-panahy mendrika halain-tahaka ho an’ny raiamandreny sy ny mpitondra mbamin’ny mpitarika rehetra izany rehefa misy zava-manahirana.

2- Matokia Azy!

Ny tonom-bavaka nasandratr’i Josafata dia mampiseho fa olona matoky an’Andriamanitra Izy. Fantany fa tsy manan-kery hoenti- manohitra ny fahavalony izy, raha tsy co ny fanampian’ Andriamanitra. Azony antoka kosa fa manam-pahefana amin’ny olona rehetra sy amin’ny toe-javatra rehetra mitranga Andriamanitra (and.6); mitazona ny fanekena nataony tamin’ny olony Izy ka tsy mivadika amin’izany hatramin’ny taranaka fara- mandimby (and.7); mihaino vavaka Izy ka mamonjy sy manafaka (and.9). Tsy miova ireo toetr’Andriamanitra ireo mandrak’ankehitriny sy ho mandrakizay, araka ny Tenin’i Jesoa hoe: Indro Izaho momba anareo ambara-pahatongan’ny fahataperan ‘izao tontolo izao (Mat 28.20). Koa matokia Azy!

Fanontaniana:

Nahoana no be fanahiana isika, na dia efa miyavaka aza?

Sampana Sekoly Alahady Foibe