Alahady 28 Jolay 2024

Deoteronomia 31. 1-8

Ny olom-boafidin’Andriamanitra

1- Manaiky ny fandaminany

«Mahereza sy matanjaha; fa ianao sy ity firenena ity dia hiara-miditra ao amin’ny tany… » (And. 7)

Teny nataon’i Mosesy tamin’i Josoa, teo anatrehan’ny Zanak’Isiraely izany. Teny fampaherezana nataon’i Mosesy tamin’ny famindram-pahefana izay nataony tamin’i Josoa. Tsy izy ireo anefa no nisafidy izany fa fanatanterahana ny tenin’i Jehovah (1. 38; 3. 28). Fandaminan’Andriamanitra izany. Toy izany koa isika ankehitriny. misy ny fifandimbiasana andraikitra eo amin’ny asa. Manoloana izany, tokony hanaiky isika fa fandaminana avy amin’Andriamanitra izany. Andriamanitra no mifidy sy manendry eamin’ny asa fanompoana iray, adidintsika kosa ny manaiky ny fandaminany. Manana ny safidiny i Jesoa Kristy (Jao.15. 16) ka ekeo amim-pahatsorana ny fifidianany.

2- Omeny teny toky

«Ary Jehovah no mandeha eo alohanao (…) koa aza matahotra na mivadi-po ianao. » (And. 8)

Nomen’Andriamanitra toky i Josoa, tamin’ny alalan’i Mosesy fa Jehovah no hiaraka aminy, tsy handao azy mihitsy, indrindra hialoha làlana azy amin’ny ady fakana ny tany Kanana. Manoloana izany, tsy tokony hatahotra izy hitarika ny Zanak’Isiraely hiditra amin’ny tany Kanana. Andriamanitra manome toky ny olom-boafidiny. Ho anao àry, nofidin’ Andriamanitra amin’io andraikitra io ianao, momba anao Izy, mialoha lalana anao Izy, miady ho anao Izy. Koa matokia, aza matahotra, ary aza miankina amin’ny herin’ny tenanao ihany koa fa miankìna Aminy mandrakariva. Efa nomena antsika i Jesoa Kristy hiara-miasa amintsika amin’ny alalan’ny Fanahy Masina.

Koa matokia Azy.

Fanontaniana:

Inona no olana mahasarotra ny fifandimbiasan-toerana?

Sampana Sekoly Alahady Foibe